مع إن كل الخلق من أصل طين
وكـلـهـم بـيـنـزلـوا مـغـمـضــين
بـعد الدقايق والشهور والسنين
تلاقى ناس أشرار وناس طيبين
عجبى!!!
عجبى عليك..عجبى عليك يازمـن
يـابـو الـبـدع يـامـبكى عينـى دمـا
إزاى أنــا أخـتـار لـروحى طريـق
وانا الللى داخل فى الحياة مرغما
عجبى!!!
مرغم عليك ياصبح مغصوب ياليل
لا دخلتا برجليـا ولا كـان لـى مـيـل
شـايلـنى شيل دخلت انا فى الحيـاة
وبكرة ح اخرج منها شايلنى شيـل
عجبى!!!
سنوات وفايته عليا فوج بعد فوج
واحـدة خـدتـنـى إبن والتانية زوج
والتـالتـة خـدتنى أب والـرابعة إيه
إيه يعمل اللى بيحدفه موج لموج؟
عجبى!!!
وانا فى الضلام ..من غير شعاع يهتكه
أقــف مكــانـى بـخـــوف ولا أتــركـــــه
ولـمـا بـيـجـى النـور وأشـوف الـدروب
أحـــــتــــــار زيـــــادة ..أيـهـم أسـلـكـه
عجبى!!!
نظـرت فى المـلكوت كتير وانشغلت
وبكل كلمة (ليه؟)و(عشانيه) سألت
اسـأل ســؤال..الــرد يـرجع ســؤال
واخــرج وحـيرتـى أشـد ممـا دخلت
عجبى!!!
خرج ابن آدم من العدم قلـت : ياه
رجــع ابـن آدم لـلـعـدم قـلـت : ياه
تراب بيحيا ... وحي بيصير تـراب
الأصــل هو الموت و الا الحـيـاه ؟
عجبى!!!
ضـريـح رخـام فيـه السـعيد انـدفـن
وحـفـره فـيــها شريد مـن غير كفن
مــريــت عــليـهم..قـلـت يـاللـعـجـب
لاتـنـيـن ريـحـتـهم فيها نفس العفن
عجبى!!!
يـامـا صـادفت صحاب و ما صاحبتـهـمش
و كاسات خمور و شراب و ما شربتهمش
أنــدم عـلـي الـفـــرص اللـي انـا سـبـتـهـم
و الا عــلي الفـــرص اللــي ما ســبتهمش
عجبى!!!
و الكون ده كيف موجود من غير حدود
و فـيـه عــقـارب لــيه و تـعـابـيـن ودود
عـالـم مـجـرب فــات و قــال ســلامـــات
ده يامـا فـيه ســؤالات من غـيـــر ردود
عجبي!!!
غدر الزمان ياقلبى مالهوش أمان
وحـايـجـى يوم تحـتاج لحبة إيمان
قلبى ارتجف وسألنى..أأمن بإيه؟
أأمــن بـإيـه محتـار بقـالى زمــان
عجبى!!!
يـا بـاب أيـا مـقـفـول .. إمـتي الدخــول
صـبـرت يـامــا و الـلـي يـصــبـر يـنـول
دقيت سنين .. و الرد يرجع لي : مين؟
لـو كـنـت عـارف مـيـن أنا.. كنت أقول
عجبي!!!
سـهـيـر ليـالي و يـامـا لـفـيت و طفت
وف ليلة راجع في الضلام قمت شفت
الـخـوف .. كـأنـه كـلب سـد الـطـريـق
و كـنـت عــاوز أقـتـلـه .. بـس خـفـت
عجبي!!!
كان فيه زمان سحليه طول فرسخين
كـهـفين عـيـونها و خشـمها بربخـين
مــاتت. لكيـن الرعـب لـم عـمره مات
مـع إنـه فـات بدل التـاريـخ تـاريخـين
عجبي!!!
أنا شاب لكن عمري ولا ألف عام
وحـيـد لـكـن بـيـن ضـلوعي زحام
خـايـف ولـكـن خـوفـي مـنـي أنــا
أخــرس ولـكـن قـلـبي مليان كلام
عجبي!!!
أحــب أعـيـش ولـو أعيـش في الغابات
أصـحــي كــمـــا ولـدتــنـي أمـي وابـات
طائر؛ حوان؛ حشرة؛ بشر؛ بس أعيش
مـحـلا الـحيــــاة.. حـتـي في هيئة نبات
عجبي!!!
عـجـبـتـنـي كـلـمـة مـن كـلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنـا كـل قـلـب دخـلـت فيه اتحرق
عجبي!!!
رقـبـة قـزازة و قـلبـي فـيـها انحشـر
شربت كاس و اتنين و خـامس عشر
صاحبت ناس م الخمرة ترجع وحوش
و صاحبت ناس م الخمرة ترجع بشر
عجبي!!!
كـل الـلى فـى الخـمارة صابهم جنون
صبحوا الرجال يتبادلوا كاس المنون
وبـدم ونـبــيــت انــكـتـب ع الـجــــدار
"يـا مـيـت نـدامة ع اللى قلبه حنون"
عجبى!!!
قـالـوا الشـقـيق بيمص دم الشقيق
والناس مهياش ناس بحق وحقيق
قـلـبى رمـيـتـه وجـبـت غيره حجر
داب الـحـجـر..ورجـعـت قلبى رقيق
عجبى!!!
يوم قلت آه.. سمعونى قالوا فسد
ده كـان جـدع قـلبه حديد واتحسد
رديـت على اللايمين أنا وقلت..آه
لـو تـعـرفــوا مـعـنـى زئير الأسـد
عجبى!!!
بين موت وموت.. بين النيران والنيران
ع الـحـبـل مـاشـيـيـن الشـجـاع والجـبان
عـجـبـى عـلادى حــيـاة..ويــا للـعـجـــب
إزاى أنـــا – يــاتخــيـن – بقيت بهلوان
عجبى!!!
أنا قلبى كان شخشيخة أصبح جرس
جـلـجـلت به صحيوا الخدم والحرس
أنـا المـهـرج ..قـمتـوا ليه خفتوا ليه
لاف إيدى سيف ولا تحت منى فرس
عجبى!!!
دخـل الـربيع يضحك لقانى حزين
نده الربيع على قلبى لم قلت مين
حـط الـربـيـع أزهاره جنبى وراح
وإيـش تـعـمـل الأزهـار للـمـيتيـن
عجبى!!!
مهبوش بخربوش الألم والضياع
قـلبى ومنزوع م الضلوع انتـزاع
يامرايتى ياللى بترسمى ضحكتى
يـــاهـلـتـرى ده وش وإلا قــنـاع
عجبى!!!
حبيت.. لكن حب من من غير حنان
وصـاحبت لكن صحبة ملهاش أمان
رحـت لـحـكـيـم واكـتـر لقيت بلوتى
إن اللـى جـوة القلب مش ع اللسان
عجبى!!!
ليه يا حـبيبتي ما بيننا دايما سفر
ده الـبـعـد ذنـب كـبـيـر لا يـغـتـفـر
ليه يا حبيبتي ما بيننا دايما بحور
أعـدي بـحـر ألاقـي غـيـره اتـحـفر
عجبي!!!
ورا كـل شـبـاك ألـف عـيـن مـفـتوحين
و انا وانتي ماشيين يا غرامي الحزين
لـو الـتـصـقـنـا نـمـوت بـضـربة حـجـر
و لــو افـتـرقـنـا نـمـوت مـتـحـسـريـن
عجبى!!!
نوح راح لحاله و الطوفان استمر
مـركـبـنا تايهة لسه مش لاقية بـر
آه م الـطـوفـان وآهين يا بر الأمان
إزاي تبـان و الدنـيـا غرقــانـه شـر
عجبي !!!
عـلي رجلي دم .. نظرت له ما احتملت
علي إيدي دم.. سألت: ليه ؟ لم وصلت
عـلي كـتـفي دم و حـتي علي رأسي دم
أنا كلي دم .. قتلت؟ ..... والا اتقتلت؟
عجبي!!!
أنـا كــل يـوم أسـمـع .. فـلان عـذبـوه
أســرح فى بــغـداد والـجـزايـر واتـوه
ماعجبش م اللى يطيق بجسمه العذاب
واعـجـب مـن اللـى يـطيق يعذب أخوه
عجبى!!!
ينبوع و في الحواديت أنا سمعت عنه
إنـه عجيب .. و ف وسط لهاليب لكنه
شـقـيـت كـما الفرسان طريقي .. لقيت
حتـي الخـنـازيـر و الكلاب شربوا منه
عجبي!!!
يا قرص شمس ما لهش قبة سما
يا ورد من غير أرض شب و نما
يا أي مـعـنـي جـميل سمعنا عليه
الخـلـق لـيـه عايشين حياه مؤلمة
عجبي!!!
شـاف الطـبيب جرحي وصف له الأمل
وعـطـاني مـنـه مـقام يا دوب ما اندمل
مجروح جديد يا طبيب و جرحي لهيب
ودواك فـرغ مـني ... و إيــه الـعـمل؟
عجبي!!!
أعرف عيون هي الجـمال و الحـسـن
و اعرف عيون تاخد القلوب بالحضن
وعيون مـخـيـة و قاسية وعيون كتير
وبـاحـس فــيــهــم كــلــهــم بـالـحـزن
عجبي!!!
إيـش تـطلبي يا نفس فوق كل ده
حـظـك بـيـضـحـك و انتي متنـكدة
ردت قالت لي النفس : قول للبشر
ما يـبـصـولـيش بعيون حزينة كده
عجبي!!!
إقـلـع غـمـاك يـا تـور وارفـض تـلـف
إكـسـر تـروس الـسـاقـيـة واشتم وتف
قال: بس خطوة كمان . وخطوة كمان.
يـا اوصـل نـهـايـة السكة يا البير يجف
عجبي!!!
يا حزين يا قمقم تحت بحر الضياع
حـزين أنــا زيـك و إيـه مـسـتـطـاع
الـحـزن مـا بقالهوش جلال يا جدع
الحـزن زي الـبـرد .. زي الـصـداع
عجبي!!!
في يوم صحيت شاعر براحة و صفا
الـهـم زال و الـحـزن راح واخـتـفـي
خـدني العجب و سألت روحي سؤال
أنـا مـت ؟ .. ولا وصلت للفلسفة ؟
عجبي!!!
الـفـيلـسـوف قـاعد يـفـكر سيبوه
لا تـعـمـلوه سلطان ولا تصـلبـوه
مـا تعرفوش إن الفلاسفه يا هوه
الـلي يـقـولـوه بيـرجعوا يكدبوه؟
عجبي!!!
عـلـي بــعــد مــلـيون ميل من أرضنا
مـن الـفـراغ الكـــونــي بـصـيـت أنـا
لا شــفت فـرق بين جـبـال و بـحــور
و لا شـفت فرق ما بين عذاب أو هنا
عجبي!!!
إنـسـان أيـا إنــســان مـــا أجـــهـلـك
ما أتفهـك فـي الـكـون و مـا أضـألـك
شمس وقمر و سدوم و ملايين نجوم
و فـاكـرهـا يـا مـوهـوم مـخـلوقه لك؟
عجبي!!!
نـظـرت فـوق للـنـجـوم و انا سايـر
رجـلـيا عترت في الحفر و الحجايـر
بقيت أقول و انا ع التراب: يا سلام
مـش بـس عـبـره أخـذت لـكن عباير
عجبي!!!
- يا نجم .. نورك ليه كده بيرتجف ؟
هـو انـت قـنـديـل زيت ؟ أو تختلف ؟
- أنــا نجـم عـالي .. بس عالي قوي
و كـل مـا انـظـر تحت اخاف انحدف
عجبي!!!
السم لو كان في الدوا .. منين يضر ؟
و الـمـوت .. لو عدونا .. منين يسر؟
حـط الـقـلـم فـي الـحـبر و اكتب كمان
و العبد للشـهـوات .. مـنـيـن هو حر؟
عجبي!!!
وقفت بين شطين علي قنطــــــــــــــــــرة
الكـدب فـيـن و الصدق فيـــــــــــن يا تري
محتـار ح اموت .. الحوت خرج لي وقال
هـو الـكـلام يتقــــــــــــاس بالمســـــطرة؟
عجبي!!!
سرداب في مستشفي الولاده طويل
صرخات عذاب ورا كل باب وعويل
..وفي الطــــــريق متزوقين البنات
متزوقـــــــــــــين للحب و المواويل
عجبي!!!
الدنيا أوده كـــــــــــبيره للانتظار
فيها ابن أدم زيه زي الحـــــــمار
الـهم واحد .. و الملل مشــــــترك
ومفيش حمار بيحاول الانتـــــحار
عجبي!!!
أيـوب رمـاه البين بكـل العـــــــــلل
سـبـع سـنـين مرضان وعنده شلل
الصــــبر طيب .. صبر أيوب شفاه
بـس الأكـــــــــاده مات بفعل الملل
عجبي!!!
نسمة ربيع لكن بتكوي الوشـــــــوش
طيور جميلة بس من غير عشـــوش
قلوب بتخفق .. إنما وحــــــــــــــدها
هي الحياه كده .. كلها في الفاشوش
عجبي!!!
يا طير يا عالي في الســــــما طظ فيك
ما تفتكرشي ربنا مصطــــــــــــــــفيك
برضـــــــــــك بتاكل دود و للطين تعًًًًودً
تمـــــــــص فيه يا حلو .. و يمص فيك
عجبي!!!
كروان جريح مضروب شعاع م القمر
سقط من السموات فؤاده انكســـــــــر
جريت عليه قطه علشان تبلعـــــــــــه
أتاريه خيال شعراء و مالهـــــوش أثر
عجبي!!!
ياللي نصحت الناس بشــــــــــــــرب النبيت
مـع بـنـت حلوه .. وعود وضحك وحديت
مش كنت تنصحهم منين يكســــــــــــــــبوا
تمن ده كله ؟ .. و الا يمكن نســـــــــــيت
عجبي!!!
ما حد في الدنيا واخد جزاتــــــــــــــــــه
و لا حــــــــــــــــد بيفكر في غير لذاذاته
ما تعرفيش يا حبيبتي .. أنا وانتي مين؟
إنتي عروس النيل .. و أنا النيل بذاته
عجبي!!!
إخطفني ياللي تحبني ع الحصان
الدنيا قالت يوم في ماضي الزمان
إخطفني ياللي تحبني ع الـــــفرس
الدنيا قالت .. قام خطفها الشيطان
عجبي!!!
من بين شقوق الشيش و شقشقت لك
مع شهقة العصافير و زقزقـــــــت لك
نهار جديد انا . . قوم نشوف نعــمليه
انا قلت يا ح تقتلني .. يا ح أقــــــــتلك
عجبي!!!
قلبي عليل يا ناس و في الكاس دواه
مديت له إيدي شربت م اللي حــــواه
جنبي الشمال خف .. اليمين اتــــوجع
و إيه يداوي الكبد م اللي كـــــــــــواه
عجبي!!!
دي مذكرات وكتـبـتـهـا من ســـــــــنين
في نوتة زرقا لون بحور الحنيــــــــــــن
عترت فيها .. رميتها في المهمـــــــلات
وقـلـت أمـا صـحـيـح كـلام مـخـبـولـيـن
عجبي!!!
دخل الشتا وقفل البيبان ع البـــيوت
وجعل شعاع الشمس خيط عنـكبـوت
وحاجات كتير بتموت في ليل الشــتا
لكن حاجات أكتر بترفض تمــــــوت
عجبي!!!
- الدنـيـا مـن غـيـر الـربـيـع مــــــــيـته
ورقة شجر ضعفـــــــانه و مـــفـــــتــته
- لا يـا جـدع غـلـطـان تــأمــل وشـوف
زهر الشتا طالع فــــــــي عز الشـــــتا
عجبي!!!
ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كـــــبار
و ما لكش غير منقار و قادر تعيش
عجبي !!!
سمعت نقطة ميه جوه المحيـــــــط
بتقول لنقطه ما تنزليش في الغويط
أخاف عليكي م الغرق .. قلـــــت أنا
ده اللي يخاف م الوعد يبقي عبيط
عجبي!!!
جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــــئ
مع إن – عجبي – كل شئ موجود
عجبي!!!
جالك اوان وعرفت مشي الجنايــــــــز
كيف شفتها يا عبد رب اللذايــــــــــــذ
قال : شفت شيل بالحيل فقير أو اميـــر
كما شالوا في الخمامير فواضي القزايز
عجبي!!!
أنا كنت شئ و صبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه ووشوشني قال :
لابد ما يموت شئ عشان يحيا شئ
عجبي!!!
يا مشرط الجراح أمانة علـــــــــــيك
و انت ف حشايا تبص من حواليــك
فيه نقطة سوده في قلبي بدأت تبان
شيلها كمان .. والفضل يرجع إليك
عجبي!!!
كيف شفت قلبي و النبي يا طبيــــــــــــب
همد و مات و الا سامع له دبيـــــــــــــب
قاللي لقيته مختنق بالدمــــــــــــــــــــوع
و ما لوش دوا غير لمسه من إيد حبيب
عجبي!!!
تسلم يا غصن الخوخ يا عود الحطـــــــــب
بييجي الربيع .. تطلـــــــــــع زهورك عجب
و انا ليه بيمضـــــــــــي ربيع وييجي ربيع
و لسه برضك قلــــــــــــــــــبي حتة خشب
عجبي!!!
بـحـر الـحـيـاه مـليان بغرقي الحياه
صرخت خش الموج في حلقي ملاه
قارب نجاه! .. صرخت قالوا مفيش
غـيـر بـس هـو الـحـب قارب نجاه
عجبي!!!
فـارس وحـيـد جـوه الدروع الحديد
رفرف عليه عصفور وقال له نشيد
منين منين .. ولفين ولفين يا جدع
قـال مـن بـعـيـد و لـسه رايح بعيد
عجبي!!!
كـان فـيـه قـمـر كأنه فرخ الحمام
علي صغره دق شعاع شق الغمام
أنـا كـنـت حـاضر قلت له ينصرك
إشـحـال لـمـا حـتـبـقي بـدر التمام
عجبي!!!
كـربـاج سـعـاده وقـلـبـي مـنـه انجـلد
رمـح كــأنـه حــصــان و لــف الـبـلـد
ورجع لي نص الليل و سألني .. ليه
خـجـلان تـقـول انـك سـعـيـد يـا ولد
عجبي!!!
مزيكة هادية الكون فيها انغـــــمر
وصـيـف و لـيـل و عقد فل و سمر
يـا هـلـتـري الناس كلهم مبسوطين
و يـا هلتري شايفين جمال القمر ؟
عجبي!!!
إنشد يا قلبي غنوتك للجمــــــــــــــــال
وارقص في صدري من اليمين للشمال
ما هو مش بعيد تفضل لبكره سعيــــــد
ده كل يوم فيه الف الف احتمــــــــــــال
عجبي!!!
آه لو انا و محبوبى جزنا الفضـــــا
في سفينة وحدينا .. واشيا رضـــا
ساعة صفا تعجبنا نرجع لهــــــــــا
و الهم قبل ما ييجي .. يبقي مضـى
عجبي!!!
أنا إله الوجد رب الهيــــــــــــــــام
أضرب بسهم الوهم وهم الغـــــرام
وهم الغرام من كتر ما هو لذيـــــذ
رشقت انا ف صدري جميع السهام
عجبي!!!
حدوته عن جعران و عن خنفســــــــــه
اتقابلوا حبوا بعض ساعة مســـــــــــــــا
و لا قال لهم حد اختشوا عيب حـــــرام
و لا حد قال دي علاقة متدنســــــــــــــة
عجبي!!!
ياللي عرفت الحب يوم و انطــــــــــــوي
حسك تقال مشتاق لنبع الهـــــــــــــــوي
حسك تقول مشتاق لنبع الغــــــــــــــــرام
ده الحب .. مين داق منه قطره...ارتوي
عجبي!!!
زحام و أبواق سيارات مزعجـــــة
للي يطول له رصيف.. يبقي نجـــا
لو كنت جنبي يا حبيبي أنــــــــــــا
مش كنت أشوف إن الحياة مبهجة؟
عجبي!!!
إيديا في جيوبي وقلبي طــــــــرب
سارح في غربة بس مش مغترب
و حدي لكين ونسان و ماشي كده
وبابتعد ما اعرفش .. أو باقـــــترب
عجبي!!!
يا ميت ندامه ع القلوب الخـــــــــــلا
لا محبة فيها و لا كراهـــــــــــه ولا
حتي يا قلبي الحزن ما عادش فيـــــك
معلهش .. لك يوم برضه راح تتملا
عجبي!!!
مرحب ربيع مرحب ربيع مرحبــــــــــه
يا طفل يا للي ف دمي ناغا وحبــــــــا
علشان عيونك يا صغنن هويــــــــــــت
حتي ديدان الأرض و الأغربــــــــــــــة
عجبي!!!
فتحت شباكي لشمس الصبـــــــــــــــــاح
ما دخلش منه غيــــــــــر عويل الريـــاح
و فتحت قلبي عشان ابوح بالألـــــــــــــم
ما خرجش منه غير محبه و سمــــــــاح
عجبي!!!
غمست سنك في السواد يا قلـــــــــــــــم
عشان ما تكتب شعر يقطر ألــــــــــــــــم
مالك جرالك إيه يا مجنون .. و ليــــــــه
رسمت ورده وبيت و قلب و علـــــــــــم
عجبي!!!
انا الذي عمري اشتياق في اشتيـــاق
و قـطـر داخل في محطة الـــــــــفراق
قـصـدت نبع السـم وشربت ســـــــــم
من كتر شوقي وعشمي في التريـــاق
عجبي!!!
انا الذي عشت الزمن مضيعـــــــــه
بروح حزينة معفنة مضعضعــــــه
زرعت شجرة سنط لجل انجــــــرح
لقتها شعر البنت و مفرعــــــــــــة
عجبي!!!
لـو فـيـه سلام في الأرض وطمان و أمن
لو كان مفيش و لا فقر و لا خوف وجبن
لـو يـمـلك الانسان مصير كل شـــــــــــئ
انا كنت اجيب للدنيا ميت ألف ابــــــــــن
عجبي!!!
العشب طاطا للنسايم و نـــــــــــــــــــــخ
أخضر طري مالهش في الحســـــــن أخ
عصفور عبيط انا .. غاوي بهجه و غنا
ح انزل هنا .. و انشا لله يهبرني فــــــــخ
عجبي!!!
أوصيك يابني بالقمر و الزهـــــــــــــور
أوصيك بليل القاهرة المسحـــــــــــــور
و إن جيت في بالك .. إشتري عقد فل
لأي سمرا.. وقبري إوعك تـــــــــزور
عجبي!!!
غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك . . تـقع
عجبي!!!
حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي!!!
يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي!!!
ولدي نصحتك لما صوتي اتنبــــــــــــح
ما تخفش من جني و لا من شبـــــــــح
و ان هب فيك عفريت قتيل إسألـــــــــه
ما دافعش ليه عن نفسه يوم ما اندبح
عجبي!!!
ولدي إليك بدل البالون ميت بالــــــون
انفخ وطرقع فيه علي كل لـــــــــــون
عساك تشوف بعنيك مصيرالرجــــــال
المنفوخين في السترة والبنطلـــــون
عجبي!!!
خوض معركتها زي جدك ما خــــاض
صالب و قالب شفتك بامتـــــــــــعاض
هي كده .. ما تنولش منها الأمـــــــل
غـيـر بـعـد صـد ورد ووجـاع مخاض
عجبي!!!
كام اشتغلت يا نيل في نحت الصخور
مـليـون بـئـونـه و الف مليون هاتور
يا نيل أنا ابن حلال و من خلفتــــــك
و ليه صعيبه علي بس الأمــــــــور
عجبي!!!
منين أجيبها كلمه متألـمـــــــــــــــــة
لعيبه فايره حايره و مصمـمــــــــــه
منين اجيبها كلمه تكون بنـــت ارض
تشفي اللي ما شافهوش كلام السمـا
عجبي!!!
أنا قلت كلمة و كان لها معنييـــــــــن
كما بطن واحده و توأمين زين وشين
لو دنيا شر .. التوأم الخير يمـــــــوت
لو دنيا خير .. الشر ح يعيش مــنين
عجبي!!!
أنا اللي بالأمر المحال اغتــــــــــــوي
شفت القمر نطيت لفوق في الهـــــوا
طلته ما طلتوش إيه انا يهمنـــــــــي
و ليه .. ما دام بالنشوة قلبي ارتوي
عجبي!!!
بره القزاز كان غيم و أمطار و بــــــــرق
ما يهمنيش – أنا قلت – و لا عندي فرق
غـيـرت رأيي بعد سـاعة زمـــــــــــــــــان
و كنت في الشارع .. و في الجزمة خرق
عجبي!!!
عيني رأت مولود علي كتف أمـــــــــــه
يصرخ تهنن فيه يصرخ تضــــــــــــمه
يصرخ تقول يا بني ما تنطق كـــــــلام
ده اللي ما يتكلمش يكتر همـــــــــــــه
عجبي!!!
يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمــــــــــا
كتم الغنا هو اللي ح يموتــــــــك
عجبي!!!
ياللي بتبحث عن إله تعــــــــــــبده
بحث الغريق عن أي شئ ينجـــده
الله جميل و عليم و رحمن رحــيم
أحمل صفاته .. وانت راح توجده
عجبي!!!
حقرا و فوق كوكب حقير محتقـــــــر
في الكون تكون دنياكو إيه يا بــــــقر
رملايه من صحرا؟ .. لكين إيش تقول
و الكون بحاله جوه عقل البشــــــر
عجبي!!!
لا تجبر الانسان و لا تخـــــــــيره
يكفيه ما فيه من عقل بيحيــــــره
اللي النهارده بيطلبه و يشتهــــيه
هو اللي بكره ح يشتهي يغيـــــره
عجبي !!!
طال انتظاري للربيع يرجــــــــــــــع
و الجو يدفا و الزهور تطلــــــــــــع
عاد الربيع عرمرم شبـــــــــــــــاب
إيه اللي خلاني ابتديت افــــــــزع ؟
عجبي!!!
و لو انضنيت و فنيت وعمري انفرط
مش عاوز الجأ للحلول الوســـــــــط
و كمان شطط و جنون مانيش عــاوز
يا مين يقول لي الصح فين والغلــــط
عجبي!!!
عاد الربيع كأنه طعم الحــــــــــــــــــب
و الحب نار جوه العروق بتصـــــــــب
اتمتع ازاي بيه وانا متقطـــــــــــــــع
من كتر خوفي لا في الخطيئة يطب ؟
عجبي!!!
ازاي شبابنا يقوم و ياخـــــــــد دوره
من غير صراخ يئذيه و يجرح زوره
يا هلتري أحسن له يقعد ساكـــــــــت
أو ينترك و لو خرج عن طــــــوره ؟
عجبي!!!
عيني رأت عصفور ووياه ابـــــــــنه
بيحدفه في الريح و ياخده ف حضنه
نوبتين و تالت نوبه – عجبي عليهم
كـانـوا سـوا بـيرفرفوا و يغنـــــــــوا
عجبي!!!
احسن ما فيها العشق و المعشقــــــة
و شويتين الضحك والتريقـــــــــــــة
شفت الحياة لفيت لقيت الألــــــــذ
تغييرها و ده يعني التعب و الشقا
عجبي!!!
عجبي علي العجب العجيب العجاب
لـمـا الـحـقـيـقـة تـطـل بـعد احتجاب
وتروح و تحلا وفجأة تصبح مفيش
كمثل طراطيش بحر ياما خد و جاب
عجبي!!!
في الهو ماشي يا بهلوان إش إِش
يـا فـراشـة مـنقوشة علي كل وش
شـقـلـبـت عـقـلـي و عقلي شقلبني
و كـنـت بـاحسبني بقيت ما اندهش
عجبي!!!
وقفت ساعة الصبح باغسل سـناني
قـالـت لي شايف قوتي و لمـعـاني ؟
إيش تطلب اليوم مني ضحكة أسد ؟
والا ابـتـسـامـة اعلانات أمريكاني ؟
عجبي!!!
يا كل كلمة للعجب في قامــــــــــــوس
انـسـكـلوبيديا لسان العرب أو لاروس
تعالوا نجدة . ده لسه في عصـــــرنا
الشمس و البحر العريض بالفـــلوس
عجبي!!!
الموج تلول تهبط وتطلع تلــــــــــــول
يا بحر خدني الشط صاحبك ملـــــــول
و الا بلاش الشط ح اعمل به أيـــــــه
ده ريحته طحلب مهري و ام الخلــول
عجبي!!!
عيني رأت مخلوق في غاية البشاعة
أنا قلت له لما تأملته ساعـــــــــــــة
اللذه و الموت علموك اللــــــــــزج
وانا علموني الفلسفة و الشجاعــة
عجبي!!!
علقت في المسمار قناع مهزلة
ومعاه قناع مأساة بحزنه ابتـــلا
بصيت لقيتهم يشبهوا بعضهـــم
واهو ده العجب يا ولاد و الا فلا
عجبي!!!
غسل المسيح قدمك يا حافي القـدم
طوبي لمن كانوا عشانك خــــــــدم
صنعت لك نعليك أنا يا أخــــــــــــي
مستني إيه .. ما تقوم تدوس العدم
عجبي!!!
ما آنتاش بتلعب ليه يا روح بابــــا ؟
و لا عسكري و لا لص في عصابة ؟
إلعب أسد أو ديب رهيب أو غـــــزال
دي الدنيا في نهاية المطاف غابـــــة
عجبى!!!
ورد في ورق سلوفان يا حلوة اهديلك ؟
و الا انقله بالطين في الشتلة و اجيلـــــك
الأولاني لـــو وحا بحنـــــــــــــــــــــانــي
عجبي علي التاني بإيــــــــه يوحيلــــــــك
عجبي!!!
أنا قلبي كوكب و انطلق في المدار
حواليكي يا محبوبتي يا نور ونـــار
يلف مهمــــا يلف ما بيكتفــــــفيش
وتمللي نصه ليل و نصه نهــــــــار
عجبي!!!
الأرض شـوك أيـوه لــكـين هـايـش
و الحمرة مش يعني الطريق حايش
دي دمـنا السـيال .. وبشرة خيـــــــر
ان انتي عايشة و ان كنت أنا عايــش
عجبي!!!
إيه اللي خدته من مرور السنــــــين
يا قلبي الا دمعتك و الانيــأـــــــــــين
بتئن و ترجع و بتفرح و ترجع تحــن
مع إن مش كل البشـــــــــــر فرحانين
عجبي!!!
اوقات أفوق و يحل عني غـبــــــــــايا
واشعر كأني فهمت كل الخـبايـــــــــــا
و افتح شفايفي علشــــــان اقول الدرر
ما أقولش غير حبة غزل في الصبايــــا
عجبي!!!
يا وردة قلبي معاكي في الريح لعب
لا تعبتي م الريح و لا قلبي تعــــــــب
احنا كده : نرتاح في صخب الجنون
و في السكون بنخاف قوي و نترعب
عجبي!!!
مركب ورق من نفخة تـتـطـــــــــوح
ركـبـتـهـــا و الـكـل بـيــــــــــــــــلوح
سوحت فيها اتنين و خمسين سنــــه
للآن ..... و لا بتغرق و لا تـــــروح
عجبي!!!
عالجسر فت الصبح تحت الضباب
بين اللي لسه بينغرس و اللي طاب
ما اهتز قلبي لنبت طالع جديـــــــد
قد اللي ماشي .. وتحت باطه كتاب
عجبي!!!
يا خالق الكون بالحساب و الجبر
و خالقني ماشي بالختيار و الجبر
كل اللي حيلتي زمزمية أمـــــــل
وازاي تكفيني لباب القــــــــــــبر؟
عجبي!!!
بلياتشو قال إيه بس فايدة فنونــــي ؟
و تلات وقق مساحيق بيلونونـــــــي
و الطبل و المزامير و كتر الجعـــــــير
إذا كان جنون زبوني زاد عن جنوني
عجبي!!!
عيد و العيال اتنططوا ع القبـــــــور
لعبوا استغمايه .. و لعبوا بابــــــور
و باللونات و نايلونات شفتشـــــــي
و الحزن ح يروح فين جنب السرور
عجبي!!!
أنا قلبي كورة و الفراودة أكــــــــــم
ياما اتنطح و انشاط و ياما اتعكـــــم
و اقول له كله ح ينتهي في المعـــاد
يقول بساعتك ؟ و الا بساعة الحكم ؟
عجبي!!!
الضحك قال يا سم ع التكشيـــــــر
امشير و طوبه وانا ربيعي بشيـر
مطرح ما باظهر بانتصر ع العدم
انشالله أكون رسماية بالطباشيــر
عجبي!!!
يا ملونين البيض في شم النسيـــــم
لون الحنين و الشوق و خمر النديم
ما تعرفوش سايق عليكو النبــــــي
تلونوا الأيام بلون النعيــــــــــــــم ؟
عجبي!!!
الدنيا صندوق دنيا .. دور بعــــد دور
الـدكـة هي .. و هي كل الديكـــــــــور
يمشي اللي شاف ويسيب لغيره مكان
كان عربـجـي أو كان امـبـراطــــــــور
عجبي!!!
قالوا السياسة مهلكة بشكل عـــــــــــام
و بحورها يا بني خشنة مش ريش نعام
غوص فيها تلقي الغرقانين كلهــــــــــم
شايلين غنايم .. و الخفيف اللي عـــــام
عجبى!!!
علم اللوع اضخم كتـــــــــاب في الأرض
بس اللي يغلط فيه يجيـــــــــبــه الأرض
أما الصراحة فأمرها ســـــــــــــــــاهل
لكن لا تجلب المال و لا تصون العرض
عجبي!!!
أنا كان لي أب . و كان رئيس محكـــمه
ستين سنة .. في قضية واحدة أترمي
ستين سنة و طلع براءة و خــــــــرج
يشكي الحياة و الموت لرب السمـــــا
عجبي!!!
3 comments:
انا مبسوطة انهم بقوا عندي كدا ورا بعض:)
كنت هنقي اكتر حاجات عجبتني بس من كترهم تراجعت عن الفكرة
لو عندك منهم تاني يا ريت
:D
ميرسى يا كريم على البوست الجامدة دى
بجد الرباعيات دى انا بموت فيها وكان نفسى تبقى عندىsoft copy
والحمد لله اتحققت الامنية
ياريت بقى تعمل سلسلة صلاح جاهين:D:D
بجد شكرا أوي انا من زمان كان نفسي اقراهم هم لا عندي هارد ولا سوفت بس دلوقتي عندي سوفت ........ ميرسي علي جهدك يا كريم ,,,, علي فكرة انا لاعمري شوفتك ولا اعرفك بس لازم اشكرك علي مجهودك .
Post a Comment